Далайн эрэгийн байшингууд

Би та бүхэнд өөрийн хамгийн дуртай номнуудын нэгийг танилцуулмаар байна.
Анжелика Таашений эмхтгэн гаргасан фото зураган "Seaside Interiors", 2005 он, ном юм. (Seaside Interiors edt. by Angelika Taschen and Diane Dorrans Saeks, Köln 2005).
Taschen гэдэг уг герман хэвлэлийн газар хямдавтар үнээр сайн чанартай, сайн агуулгатай фото ном гаргадагаараа дэлхийд алдартай. Нэгэн найзындаа сууж байгаад санаандгүй уг номыг олж харав.
Дэлхийн таван тивийн далайн эрэгт амьдардаг зарим нэгэн хүмүүсийн амьдралын хэв маяг, тэдний байшин, байшингийн засал тохижилтыг харуулсан, 303 хуудастай, гурван хэл дээр тайлбартай фото ном.

Энэ номонд би яагаад дуртай вэ гэвэл: Энэ номонд орсон зураг нэг бүр намайг тухайн газар аваачих шиг, миний мөрөөдлийг хөглөх шиг, намайг дэлхийн хамагийн сайхан газаруудад аваачиж амраах шиг...ерөөсөө намайг аз жаргалаар хөглөдөг юм.

Ном маань эхлээд европ тив дэх байшингуудаар аялана. Гэртээ урьсан хүний талаар товч тайлбар өгч, тухайн байшингийн бүхэл фотог нь тавина.
Номонд орсон ихэнх хүмүүс бүтээлч ажил эрхэлдэг хүмүүс тул тэдний байшингаа тохижуулсан арга маяг хүртэл бүтээлч мөн индивидуалист шинжтэй.
Мөн эдгээр хүмүүс байгалийг яаж өөрийн байшингийн салшгүй нэгэн хэсэг болгон ухаалаг шийдэл гаргасаныг энэ номноос харна. Байшингууд ихэнх нь байгалиас тусгаарласан биш харин эргэн тойрондох орчинтойгоо уусан нэг цул болсоныг эндээс харж болно. Эдгээр байшингуудын салшгүй нэгэн хэсэг бол далай. Далайн цэнхэр өнгө, сэтгэл уужируулсан уудам далайн мэдрэмжийг энэ номноос олж мэдэрнэ. Мөрөөдөлийг хөглөн сайхан ертөнцөд очсон мэт мэдрэмж зурагуудыг үзэхээр өөрийн эрхгүй төрнө.

дээрх зураг 50р нүүрт буй. Маш өнгөлөг энэ хана. Өрөөнд байгаа хүнсний ногоо. Энэ бүхэн бүрэн хоорондоо зохицсон. Хана туурга тэв тэгш биш нь өрөөнд илүү тохилог уур амьсгал өгнө, амьдрал, хиймэл бус байдалыг улам тодотгох мэт.
дээрх зураг 116р нүүрт бий. Далайн эргийн сайхан байшингуудад нийтлэг байх нэгэн зүйл бол тэдний өнгө. Ихэнх нь цагаан эсвэл цэнхэр өнгөтэй. Зарим нь хад уулаа дагаад бор саарал бараан ч өнгөтэй. Далайн эрэгийн халуун дулаан газарын байшингууд цагаан цэнхэр өнгийг ихээхэн хослуулсан байдаг.
дээрх фото 221р талд. Далай нуурын эрэг дээрх байшингуудад заавал байх ёстой нэгэн зүйл бол бидний хэлж заншсанаар балкон буюу terrace/Terrasse. Жаргаж байгаа нар. Далай. Гэр бүлээрээ. сайхан хоол ундтай ширээ тойрон суух, бүгдээрээ хамтдаа жаргалтай оройг өнгөрөөх. энэ жаргал биш гэж үү?
246р хуудас. Уг номоо үзээд надад хамагийн таалагдсан зүйл: хүмүүс модон эдлэлийг хэрэглэсэн байсан нь. Янз бүрийн модоор, янз бүрийн зүйл хийсэн. Жирийн сандалаас эхсүүлээд хуучин завиа ор болгон янзлах гээд л... Мод бол тухайн гэрт, байшинд маш сайхан уур амьсгал өгдөг. Дулаан уур амьсгалыг түгээдэг.

Нар, ус, агаар... энэ бүхэн дээрх зураган дээрээс (276р хуудас) шууд л мэдрэгдэх мэт. Далайн эргийн сайхан байшингуудын хамагийн чухал нэгэн зүйл бол мэдээж цонх. Далайн эргийн байшин миний хувьд заавал далайг харуулсан, түүний салхийг надад мэдрүүлсэн, далайн үнэрийг саадгүй оруулах сайхан том цонхтой байх ёстой.

Хаа нэгтэй явж байхад чинь энэ ном тааралдвал заавал үздэг юм шүү.

зураг дээр дарж томоор харна уу.
(амазоноос худалдаж ч авч болно http://www.amazon.de/Seaside-Interiors-Diane-Dorrans-Saeks/dp/3822847569)