"Дэлхийн сүйрэл 2012" ярианд NASA хариулж байна

Update (2011.3.12): Доорх бичлэгийг уншаад дараа нь ийшээ орж өөр талаас нь хараарай
http://gunuhaanduguilan.blogspot.com/2011/03/blog-post_12.html


Хүмүүн гээч амьтан их сонин бөгөөд сонирхолтой шүү. Ирээдүйг хүлээсэн баяр эс бөгөөс гуниг, ирэх цагт ямар нэгэн гайхамшигт явдал тохиолдоно гэх найдвар эсвэл азгүйдэл, гай гамшиг учирах вий гэх айдас, ирээдүйгээс айх мухар сүсэг энэ бүгд хүмүүнийг эзэмдэнэ; энэ байдал угаас түүний уг чанар бололтой. Нэг талаар ирээдүйг, ирэх цагийг хэлж чадахгүй, урьдчилан харж чадахгүй мөхөс байдал нөгөө талаар чадахгүй ч чадахыг туйлаас хүсэх: энэ бол хүн төрөлхтөний мөнхийн зөрчил байх биз "чадахгүй ч чадахыг хүсэх". Үүнээс гадна хүмүүнд хагацал, гашуудал эмгэнэлийг хүсч мөрөөдөх явдал байдаг бололтой

Энэ мухардмал байдалаас гарах нэг оролдлого бол ОЮУН УХААН. Оюунаа, ухаанаа, сэтгэн бодох чадвараа хөгжүүлж, танин мэдэж, их мэдлэг цуглуулвал ирээдүйг урьдчилан таамаглаж, мухар сүсэгээсээ салж чадна гэх итгэл төрөв. Ийнхүү бодож байсан 16,17,18р зууны хүмүүс өнөөдөрийн хүмүүсийг харвал толгой сэгсрэх байх даа. Хэдийгээр хүн төрөлхтөн урьд хожид байгаагүй техник, технологийн боломж чадвартай, хорвоо дэлхийг таниж, бага гэлтгүй мэдлэг мэдээлэлийг цуглуулсан, оюун ухааныхаа үр шимийг хүртэн амьдарч буй ч 21 р зуунд "мухар сүсэг" тээ автсан хэвээр. Мухар сүсэг устан үгүй болно гэдэг шиг утопи бодол үгүй бололтой. Хамагийн зөв зам нь мухар сүсэг, элдэв айдастайгаа яаж харьцаж сурах вэ л гэдэг асуулт бололтой.

Дэлхийн сүйрэл, элдэв далдын хүчинд итгэгчид, эзотерик хүрээнд байнга яригддаг нэг сэдэв бол "2012 онд дэлхий сүйрэнэ". Ялангуяа АНУ, европ, орос зэрэг газаруудад үүнд итгэдэг хэдэн сая хүн байдаг. Зарим нь ч бүр энэ бодолдоо итгээд манайхаар бол улаан галзуу болчихсон. Тиймэрхүү хүмүүстэй тааралдаж л явлаа. Гэхдээ тэд бүгд дэлхий сүйрэнэ гэж бас хэлдэггүй. Бидний амьдарч байгаа энэ цаг үед дургүй, үзэн яддаг зарим нэг хүмүүс шинэ цаг үе ирж, муу хүн байхгүй болж хүн төрөлхтөн ухамсарын хувьд том эргэлт хийнэ гэдэг. Эдгээр хүмүүс янз бүрийн боловсрол мэдлэгтэй. Их сургуулийн профессор итгэчихсэн явж байх нь ч бий, судалгаа шинжилгээнээс ангид ажилчин ч бий.

Ядаж байхад яр гэгчээр мөнгөний машин Холливуд "2012" нэрт кино хийжээ. Зарим нэгэн хүмүүс, даанч хөөрхий, үзсэн киногоо бодит байдал гээд итгэчихсэн. Дэлхий сүйрэх нь гэсэн мэдээ манай монголд амнаас ам дамжин тархаж, вэб хуудас болгоны мэдээ доор "яанаа 2012 он ирэх нь" гэсэн сэтгэгдэл дүүрэн. Мөн дэлхийн хойд тал бөмбөрцөгийг нөмөрөөд буй тэсгэм хүйтэн өвөл, УБт мэдрэгдсэн хэд хоногийн өмнөх газар хөдлөлт, Хөтөл суманд гурван нар гарчээ гэсэн мэдээ энэ бүгд нийлээд үнэхээр л дэлхий сүйрэхийн урьдчилсан дохио мэт санагдаж буй бололтой.

Гэхдээ чухал асуулт байна. 2012 онд дэлхий сүйрэнэ гэдэгийг хэн хэлэв? Эсвэл 2012 онд дэлхий сүйрэнэ гэдэгийг яаж урьдчилан мэдэж байна? Дэлхий устаж үгүй болох гэж байгаа юм уу, байгалийн гамшиг болох гэж байгаа юм уу? Хэрэвээ сүйрэх гэж байгаа бол ямар шинж тэмдэг илэрч байна? Яагаад заавал 2012? Ямар хүмүүс үүнд итгэж байна? Эсрэг баримт нотолгоо, шүүмжлэл байна уу?... гээд зөндөө асуулт. Энэ сүйрэлийн тухай яриа бол ихэнх монгол хүмүүст шинэ мэдээ байх. Гэхдээ бусад улс оронд ялангуяа жишээ нь АНУ, европ, орост энэ яриа дор хаяж 20н жилийн өмнөөс яригдаж байгаа гэдэгийг мэдэх хэрэгтэй. Тиймээс энэ яриа хаанаас гараад ирэв, хэн ингэж ярьж явааг тэндээс хайх учиртай.

"Дэлхий 2012 онд сүйрэнэ" гэсэн яриа бүр хэрээс хэтээрээд америкийн огторгуй сансар судлалын үндэсний газар NASA албан ёсоор өөрийн вэб хуудасандаа энэ сэдэвтэй холбоотой хариулт аль өнгөрсөн зургаан сард (11.06.09) өгсөн билээ. Энэ газарын, эдгээр хүмүүсийн үгэнд итгэж болох уу? Эдгээр хүмүүсийн өдөр тутамын ажил, судалгаа, ярианы сэдэв бол од гариг эрхэс, нар сар, солир, дэлхийн байр байдал гэх мэт. Бидний зүгээр л сонирхох төдий, кино зурагтнаас олж авдаг мэдээлэл бол тэдний хувьд ажил нь болохоор үнэн худал, буруу зөвийг бид бүхэнээс илүүтэй мэдэж байгаа тул тэдний үгэнд анхааралаа хандуулах нь зүйтэй.

Тиймээс бид NASA ын эрдэмтэд юу хэлж байгаад анхааралаа хандуулъя.
Судлаачид 2012 онтой холбоотой асуултуудад хариу өгчээ. Тэдгээр асуулт хариултыг дор хураангуйлан өөрийн үгээ нэмэн бичвэл:

• Дэлхий сүйрэхийг урьдчилан хэлэгчид яг ямар өдөр болохыг нь хүртэл мэдэж байгаа: тэр өдөр нь 2012 оны 12 сарын 21. Энэ өдөрөөс өдөр уртасч эхэлдэгийг хүн бүр мэднэ.

• Манай гаригт 2012 онд ямар нэгэн аюул заналхийлж байгаа юу гэсэн асуултанд үгүй гэсэн байна. Дэлхий гэх гариг маань одоогоор 4 тэрбум жилийн турш сүйрэлийн аюулд өртөлгүй оршиж байна.
• 2012 онд дэлхий сүйрэнэ гэх яриа хаанаас гарвалтай вэ? Эртний Сүмэрүүд мэдэж байсан ч өнөө цагийн бид мэдэхгүй байгаа нэгэн үл мэдэгдэх Нибирү нэрт гариг дэлхийд ойртоно гэсэн ярианаас гаралтай аж. Энэ гариг дэлхийд ойртож гай гамшиг дагуулна гэж тооцоолж байсан байна. Гэхдээ уг гариг 2003 онд дэлхийд ойртох байтал тийм зүйл болоогүйг бид бүгд мэдэж байгаа. Тиймээс 2012 онд болох учиртай гэж зөгнөгчид сүйрэл болох хугацааг хойшлуулжээ. Дээрх эрт баларын ярианд итгэх итгэл бас нэг өөр зүйлтэй нэгдэв. Эртний Маяачуудын календарийн нэг мөчлөг 2012.12.21 нд дуусна хэмээх уг хоёр үйл явдалыг холбон хамтруулаад хоёулангаас нь айхаар шийдэв. Нэг зүйлээс айх нь олон зүйлээс айхаас хамаагүй амар болохоор. Маяачуудын календарийн нэг мөчлөг гэхдээ яг энэ өдөр дуусах эсэх ч бас тодорхойгүй байгаа юм. NASA эрдэмтэдийн хувьд Нибирү буюу үл мэдэгдэх гариг бол зүгээр л интернэт онигоо.
• Хүмүүс 2012.12.21 нд маяа календарь дуусч цаг хугацаа зогсох мэт боддог бололтой. Гэтэл зөвхөн нэгэн мөчлөг л дуусч буй бөгөөд залгаад өөр нэг мөчлөг эхлэх аж. Улс орон үндэстэн болгон өөрийн цаг хугацаагаа тоолох арга замтай тэрний л нэг.
• Гариг эрхэсүүд дэлхийд сөрөгөөр нөлөөлөх байрлалд 2012 онд орох уу гэдэг асуултыг үгүйсгэсэн байна.
• Нибирү гариг 2012 онд дэлхийтэй мөргөлдөх эсвэл аюултайгаар ойртох байсан бол тэр гаригийг бид одоо шөний тэнгэрт харж чадах ёстой. Гэтэл тэнгэрт юу ч алга.
• 2012 онд болно гэгдээд буй нэг зүйл бол дэлхий соронзон туйлууд солигдох. Үүнийг мөн үгүйсгэсэн байна. Хэдийгээр соронзон туйлууд солигддог үзэгдэл байдаг ч дараагийн уг үзэгдэл болоход дахиад хэдэн сая жил байгаа аж.
• Динозаваруудыг устагсан солируудтай адил хэмжээний солир дэлхийтэй мөргөлдөнө гэдэгийг мөн үгүйсгэсэн байна.

Эх дэлхийгээ сүйрэхийг хүлээн суугаа сая сая хүмүүс юунд яарнав!

Доорх хуудасруу зочилж NASA гийн эрдэмтэдийн хариултыг бүрэн эхээр нь уншаарай (англи хэлээр)

http://www.nasa.gov/topics/earth/features/2012.html

Дээрх сэдэвтэй холбоотой зүйлийг NASA ын эрдэмтэн Дэвид Моррисоны дараах видеоноос үзээрэй. Уг эрдэмтэнд маш их үнэхээр айсан хүмүүс захиа ирүүлсэн бөгөөд тэдний дунд хүүхэд залуус ихээр байгаа бөгөөд зарим нь амиа хорлох хүртэл хүсэлтэй байгаагаа хэлжээ. "айх зүйл огтоос байхгүй. 2012 онд дэлхийд маань элдэв гамшиг аюул учирахгүй" гэдэгийг санаа зовсон эрдэмтэн маань дахин дахин хэлж байна.

The Truth about 2012 from NASA Lunar Science Institute on Vimeo.

2012 онд дэлхий сүйрэнэ гэх яриатай холбоотой 20н асуултанд Моррисон эрдэмтэн хариулт өгчээ. уншихыг хүсвэл дараах холбоос дээр дарна уу (англи хэл дээр)

http://astrobiology.nasa.gov/ask-an-astrobiologist/intro/nibiru-and-doomsday-2012-questions-and-answers